Zanniat miphun le ram khangso tuh daih in mah daihdan le thiamdan dan in naper zianzo ii sing.
I san song ah Zanniat hmingin pawlkom naperhnak le telhnak i tam ve hang maanin rel thil ve in ruat ing.
Miphun hrang zapui huap in na kin perdan heh phun 2 in umh ii.
1) Khrisfa lam
2) Social/Politics
1) Khrihfa lam in Zanniat hrang tawlrelhnak le dinghnak te kin tluanthu sau ngai rel pha umh napui hnuata lam ah rel nga singkhaw. Tun kin dinhmun ah Zanniat huap K hrifa lam in a lar lian ber heh GZCF cang ii. Ramsong lam tu G hmang lo in ZCF tian lek hmangin GZCF tu laivum huap in tel tuh hnak in kin rel awng ii. Ramsong le rampua Khrihfa lam ah kin naper dan heh lingthiamdun lo hnak, naper kin thiam lo hnak umh tuh thai ii. Cia lakin tunah rampua lam in tu Gobal Zanniat Christian Association (GZCA) heh rampua ai Zanniat in dinghnak church le fellowship pawl thawn rel tlang in ding zo i hang.
2) Social/Politics lam in tu Community le Youth lam in ramsong le ram pua in dinghnak le naperhnak tam ngai umh zo ii. Tun hnuata ber ah Social lam in tu ramsong in ZC (Zanniat Community) heh Kalay lam in kho ngai in ding ii. Rampua lam in tu ZC heh Delhi, Malaysia, USA le Canada ah ding ii.
Politics lam in miphun dinghmun rori in ding panhnak heh CDF-Zanniatram dinghnak in hampan kin cang ii. CDF-Zanniatram in kum 1 khimhnak ah Zanniat Conference 1hnak ko in cia conference in ramsong Zanniatram ah Council ding tuhin lung kin khim ii. Ramsong ah Council heh ding April 24, 2023 nia ah ding ii. Rampua thawn tel tlang tuhhnak pawlkom ding kul maanin Zanniatland Joint Committee (ZLJC) ding ai, hnuata ah ZLJC heh Zanniatland Peoples' Organization (ZPO) in Aug 1, 2023 ni ah ding ii.
Hetin ramsong le ram pua in pawlkom kin dinghnak te kin siik fangin kin samhnak tam ngai lakin rel i hiamhnak tu; Ramsong le Rampua tiin khandunhnak ii.
Rampua lam in tuntian ramsong hrang sumsaw in i tu seh, thula in i tu seh a thawh tento, a ruat tento heh kin tam lo ii. A liam cia kum 20 song ai kin naperdan sik fangin rampua ai Zanniat hrang ruat tento le thawh tento te tam sawn in naper har ze in ruat i hang. Rampua lam in tawlrelhnak te ramsong lam in phan takin fehpui ben lo hnak tam ngai ii. Cetih de maanin pehzomhnak kin cat zianzo in umh ii. Upa 1 in thungai le hnihsa bangin a ponghnak tu, "Kin in ramsong te pon tuh lo hang. Amah te in kin pon tu hang seh" ti ii. Cetin kin pha tuh sawn maw, rel ban lo ing.
Zanniatram song ai minung tahin in Kalay-Kabaw lam ah Zanniat mi kin tam tuh um ing. Cen, Ramsong thawna nong ber heh India le Malaysia ii. Ramdang ah vai in umh rori Zanniat tam ber ram heh USA le Australia ii.
Zanniatram song cak hnak tuh kin daih tlang ten in hmu ing. Zanniatram song cak tuhin a hiang in bawm kul ii.
Tuntian pawlkom lam in kin naperhnak i sik fangin naper kin thiam tlang lo hnak lak in i hmuhnak tu, ramsong lam in ponka ah "Ramdang in thu kin nai maseh." tihnak ponka ii.
Ramsong cak tuhin; a nong ber Kalay-Kabaw te in tel pui kul in hmu ing. Cia tahin kau deuhin Kawlram huap in tel pui kul ii. Ram pha lekhaw tlung thai te pawl, India lam ai umh te pawl heh huap dun pha in hmu ing. Ramdang (USA, Australia, Canada) ai umh te tel thilhnak tu thu dang i selai.
Daih sah dun in
Tluang Kip Thang
Canada
Comments
Post a Comment