Skip to main content

CC/CNA in Falam Ting??

By Salai Thangte Laizozanniat

Tunnai kin rualpa hnen in he ponka za ing. Thil umhdan ruat lo hrang tu cetin tun ding Falam township ai thil canghnak thu ah innhnen te in online in hlivua hmut dek hnak hiip thai te in cetin ruat lianglo tuh peu ii.

Thu umhdan tu hetin ii. 2023 kum November 13 ah Chinland Council ralkap te in Falam township song Myanmar le India ramri ai Rikhawdar khua le Khawmawi ai Tatmataw ralkap camp ciah lang ngah ii. He Tatmataw camp langhnak ah CDF-Zanniatram ralkap te tel in harsa rohin langhnak awng ii. Cia hnua CNO (Chin National Organization) le a rualpui ralkap pawlkom CB (Chin Brotherhood) in 2025 April 7 nia ah hla 5 song tawngdun hnua Falam khuapui ciah lang ngah awng ai, a ang ze in "Falam duai ni kan nei lo." tiin ramcang ah puai bawn in laam tlang thlurhthlo awng ii. Cia hnua a rai lo pah CNO/CNDF in 2025 kum July 5 nia ah CC in Tatmataw kut ai lang in kilkhawlhnak Rihkhawdar ciah kaap ai, CNA ralkap pakhat thi, CDF-Hualngoram ralkap le mipui lam in thi, mipui 3,000 lai Mizoram ah tlaan le, Rihkhawdar ai inn le dawr song ah lutin sumsaw le thilri ru sah dek awng ii. Cia hnua rai lo pah CNA (Chin National Army) in Leilet ai CNO/CNDF ralkap camp tawng ai, cetan Surbung vanzuang khophmun lam tian ai CNO/CNDF umh te hnawh zianzo le Falam township ah CNO/CNDF umh ngam lo tian in hnawt lio awng ii. Cetin Falam township heh CC hnia ah cang lio awng ii. Ikhalkhaw, CC/CNA ralkap te ciah Falam khua song ah umh lo in, Falam khua pua lam sawn in kil de ii. CNO/CNDF kut hnia ah Falam a umh fangin mipui tlung ngam lo ai, CC hnia ah Falam umh fangin Falam ah mipui tlung thil so ta awng.

Hetih bang ai CC hnia ah Falam peng cang lio awng dan thu ciah a vekin ling hiam loi lo in "CC/CNA in Falam tawng maan kin rem lo ii." ti dung in rel lianglo kin tam heh kin voi maw, kin thinlung diklo ii, tihnak ruat kuul ii. 

Falam ciah CC hnia ah umh hnua Kawl ralkap Tatmataw kut ah a umh leh dan tu hetin ii.

2025 kum October hla pan in Kawlralkap Tatmataw ciah ralkap tam roh thawn Kalay lam in Falam peng ah lut pan ii. CC le CNO ciah politics ah remdun lo napui Kawl ralkap kham tuhin CNDF thawn per tlang tuhin lungkhimhnak nai ii. Cetin Tatmataw ralkap te ciah Falam peng song ah CC le CNO/CB in hmun 3 ah hetin kham ii. Zanniatram song Webula-Lianrih lam in luthnak ciah Falam nisuak lam a hleng fangin Sumhrang ah kham ai, CDF-Zanniatram le CC ralkap te thawn kham ai, CDF-Zanniatram in ralkap pakhat in nunhnak kin liam sah ii. Parte-Lumbang-Var lam ciah CNDF/CB in kham tuh pervo lang ii. Run tipui kaan in Falam hlanglam Surbung hiang lam in lut Tatmataw ralkap te ciah CDF-Hualngoram le CC ralkap in Kuangli ah kham ii. Cetin lampui hmuin 3 in Tatmataw ralkap kawi te ciah kham ii. A hnuataber ah 2026 kum April 25 nia ah Lumbang lam in kawi hnak Tatmataw ralkap te ciah Var lam zu in kawi ai, cia heh CNDF/CB in kham lo in Zanniatram song Hmunli ah dawp berh maanin Var lam ciah khamtu umh lo in Tatmataw ralkap te ciah bai niu in Var lilawn kaan in Falam khuapui ah lut lio i hang. Cetin Falam khuapui ah Tatmataw ralkap lut zo hnua tu Sumhrang le Khuangli lam ai CDF le CNA ralkap te tu tlan kul dinhmun ah umh ii. Cetin CNDF/CB in Var lam in luthnak Tatmataw ralkap kham tuh hnak hlat lio hnak in he lai i ngan nia tian in Falam tu Tatmataw kut ah umh i hang.

Min Aung Hliang in 2021 kum in 2025 kum bo tian ciah SAC (State Administrative Council) hmingin ralkap dan in Myanmar ram uk ai, 2025 kum December 28 le 2026 kum January 25 nia ah Min Aung Hliang in amahte daihdan in rampum huap election bawn in party USDP (Union Solidarity and Development Party) in vote tam ber ngah in phuang ai, amah ciah Myanmar president per thio i hang.

Falam ciah 2026 kum April 25 nia pah Min Aung Hliang cozah in uk ngah hnua tu Falam ah Myanmar cozah thar ding hang in lungkhim tlang hlurhhlo thio hang. Falam ah tlung tuhin bai lo in thu suah tlang lianglo thio hang. 2026 kum July 31 ah Min Aung Hliang in acozah thar ni 100 song ah naperhnak ah pawlkom 13 thawn Min Aung Hliang cozai in hlathnak NSPNC (Solidarity and Peacemaking Negotiation Committee) thawn tawkdun in remrel thu phuanghnak ah CNO ciah tel zo i hang. USA lam in CC le CB remhnak tuhin dinhnak CPRI (Chin Peace and Reconcillation Initiatives) ciah 2026 kum April 8 nia ah Aizawl ah khawmpui bawnhnak ah CB le ICNCC lam in palai tel lo ti maanin CC le CB tawkdun in remrel thillo in cang zo i hang.

Ciamaan, avum thu thawn pehzom in Falam ciah CNA/CC in ting bul lo ai, tunah Falam ciah aisu in Tatmataw kut ah ap lio sawn tihnak linghiam lo kongin reldun kuul menma i hang. 












Comments

Post a Comment

Popular posts from this blog

HISTORICAL HEGEMONY, TRIBAL LINEAGE, AND MODERN DISUNITY IN CHINLAND

By Salai Thangte Laizozanniat
REPORT: HISTORICAL HEGEMONY, TRIBAL LINEAGE, AND MODERN DISUNITY IN CHINLAND - by Salai Tluang Kip Thang Topographic view of Falam Township of Chin hils on Google Map, May 11, 2026. I. Historical Expansion and the Rise of the Tlaisun Hegemony (18th–19th Centuries) The roots of today’s geopolitical and tribal tensions in Chinland can be traced to the expansion of the Tlaisun (Tashon) chiefdoms during the 18th and 19th centuries. Centered in present-day Falam, the Tlaisun established one of the most influential powers in the Chin Hills through aggressive military expansion, tribute systems, and slave-raiding economies. At the height of their influence, Tlaisun authority extended beyond modern Falam into the Lushai Hills (present-day Mizoram), parts of Manipur, and the Chindwin River lowlands, including areas such as Minkin and Mawlaik. This expansion transformed Falam into the dominant regional power long before British colonial intervention. The old Fahlam dynasty, prior to the British ...
Post a Comment
A vekin siar »

NINGHIO KUUL

By Salai Thangte Laizozanniat
NINGHIO KUUL Zanniat mi khangthar niunawn te hmu fangin konghoitu nailo tuu rual bang ii sing. Zanniat mi heh kin ninghio kuul roh. 1948 kum an Burma ram ding hnua i uham tian, 2020 kum lam tian in Zanniat tihnak miphun heh Zanniatram ah konghoi dunhnak pawlkom nai lo ii. Kin san tian ai kin ling thilhnak tu Bawhlung pawlkom ii, cia rin Run-hlang Bawhlung Pawlkom (RBP) ii. Cia hlan lam ah Run-hlang Siatton in ding awng ti ii. Run-hlang in huap lo hnak te  Lumbang khua tlang lam ciah Sakta ti ii. Sakta le Hlangta tiin kin san tian in remdun lo hnak thu nai bial ii. Zanniat miphun po hmun khua le ram, Zanniatram tu Zanniat hming in ding hnak, Zanniat hming in konghoi dun hnak pawlkom le committee pakhat niu rin umh lo ii. Kum 70 luan lam tian in Zanniat hming in konghoi dunhnak, thu rel tlang thilhnak zai khai umh lo. Mah khua niuniu in ding sio ai, khua khat le khua khat zuamdunhnak, cozah lam thil ti ben deuh te in amahte khua hrang ian ruat in thil bawn thu te za pha t...
Post a Comment
A vekin siar »