Pawlkom le Politics fehdan ruat lo kin tam

SAC maan in kin buai, raltho kuul in umh ii. SAC tawng in raltho tuhdan thu ah Zanniat mi heh hlaice in thu ruat thai lo kin tam ii. Kin ponka te ruat nga sing.

1) All in One Chin

Chin thu rel fangin Chin ing titu le Chin i lo ing tidun te pawl khanduh cih ii sing. Chin hiam lo te tu Zomi te ii. Cen, Naga te in Chin tidun ve lo ii. Chin in maithal awh pawlkom heh a ngom pah CNF ii. SAC heh maithal in tawng kul in fehpui fangin CNF daih lo in mah dahdan in hiam thaih in Chin song ah ralkap phuncang ding lianglo ii. Ziang pon hmang Falam township in minung zaimawzat CNF ah hlat in raltawng training ben in a lel hnua ah CNF kop hiam lo in CNO/CNDF ding ii. Cia hnua Township le miphun in CDF tidun in ralkap ding zianzo ii. Cetin CNO/CNDF le CDF in ralkap phuncang ding lianglo khiah thil pha ti dun ii. SAC tawng hnalam ca zo, ti dung khiah kin thruathnak, kin politics level ii.

All in One Chin ti dun ai, zaimaan a umh cia 1988 kum lam in ding zo hnak CNF/A daih lo in mah hiam dan in ralkap ding lianglo ii? All in One Chin thinlung i awm?

SAC kaap tuh thupui ti hlanlam CNO/CNDF, CDF ding kul lo napui. A umh cia Chin ralkap/CNF cak ruai in raltawng tuh thupui in ruat tuh hnak napui. SAC tawng kuul nawn lo fangin mah daihhnak Party ah lut in Election ah tel tuh, vote tuh, mah daihnak party in cuzah ding tuh menma tuh hnak napui.

Tun ai kin umhdan tu SAC tawng ti dun napui singkhaw kin thinlung in tu Hakha le Falam zuamdunhnak in dim ii. Tunnia tian Chin kin cak lo hnak, kin buaihnak thuhampui ngaingai kin sik fangin Falam le Hakha remdun lo hnak maan ii.

2021 kum rambuaihnak in Falam lam in CNF ah Training kaai ti thu za fangin, Hakha le Falam kop dun in naper tuh hang tiin hlir in lung i khim roh awng ii. Ikhalkhaw, CNF ah tel tlang hiam lo in CNO/CNDF ding hnak in cang so kio ii. Tunhlan ah CNF song ah dinhmun cuhdun hnakin Falam le Hakha tiin khandun hnak in cang awng zo ai, Falam in ralkap ding hiam in vai tam ngai tho tum de napui hlawhtling thil lo ii. Tunah Falam in 2021 kum Kawlram buaihnak in Falam in ralkap ding thilhnak in cang so hang ii.

2) Zanniat in CDF ding tuh fangin zapui sawm lo

Hetin a pongtu te in CNO/CNDF ding tuh fangin na sawm awm, zapui kin sawm awm, tihnak pong pha ve ii.

CNF ah Falam in ralkap training hlat in a tlung te in CNO/CNDF ding tuhin ning sawm awm? CNO/CNDF ding tuhin ramdang ai Zanniat pawlkom kin naihnak le Zanniat mi upa te kin sawm awm?

 

Cen, Falam Township huap in ding hnak Falam CDM Heroes pawlkom hmang in CNO/CNDF ding tuh tawlrel thu, CDM Heroes heh CNO/CNDF ah cang kio thu khiah CNO ai GS in rori in Chin TV online ah pong ii.

CDM luttu te in Falam CDM Heroes heh CNO/CNDF ah cang tuh khiah a lungkhim tlanghnak i awm?

CNO/CNDF ding tuhin ramdang ai Zanniat pawlkom pakhat niu khai official in thu rawnhnak le sawmhnak umh lo ii. Ramdang ah Zanniat in pawlkom ding khiah USA, Canada, India (Delhi) le Malaysia ii. Ramsong ah Zanniat in pawlkom tam ngai umh ve ii.

CNO ding tuh in a dingtu te in Zanniat a sawm fang in Chaungkhuah lam ah raltho in Laitlang ai Zanniat te tel hnak in Zanniatram Humhim Pawlkom (ZHP) ding vut ai, ZHP hotu 2 khiah ko vut in, Mizoram dung ai ratlan in umh hnak Zanniat upa te ko vut in CNO/CNDF khiah ding hnak ii. CNO/CNDF dinghnak ah ZHP in Zanniat zapui huap in tel tuh in Zanniat zapui thu rawnhnak umh lo ii. CNDF in Tlortang ah Camp ding tuh fangin rin Laitlang te in CNO/CNDF pawlkom hming rin ling lo ii. (Kaimah rori in Tlortang te pon ing).

ZHP te in CNO ah tel thu, CNO ralkap heh ZHP i thu nikum lam pah Zanniat zapui hnen ah rel lo ii.

Hetin thu umh hnua Zanniat hming in ralkap ding kuul dinhmun tian hleng fangin, ding kuul in ruat te in CDF-Zanniatram heh 2022 kum ah ding ii. CDF-Zanniatram ding thu phuang pah tu ZHP in CDF-Zanniatram daih lo in CNO ai hnia ah ZHP umh thu, Zanniatram heh CNO ukhnak thu phuang dumdo ii.

CNO ah Zanniat kontin tel tihnak thu pong hiam vek lo, Zanniat in CDF ding hnak tu bai lo in mah lala tawngdun hnak ponka suak lianglo in kin umh heh ruatdun kin kuul ii.