MYANMAR UNION THAR DING TUH, KIN READY AWM?

Tunah 2008 kum ai bawnhnak Daanpui khiah tunah 2020 kum lam ah kin lungkhim lo tu au lianglo ii sing.

2008 kum Daanpui bawn fangin tang kin lungkhim lo thu au aw singim?

Kawl te in Tlangvum mi heh kin zawl thliahthlo ii. 2008 Daanpui khiah May 2008 kum ah mipui hnen ah lungkhimhnak kin lang ii. Kontih bangin kin lang tihnak tu Kawl in kontin kin zawl tihnak ruat pha tam ngai. Mipui lungkhimhnak in SPDC (Nah Ah Phah) cozah in September hla 2008 kum ah Kawlram mipui lungkhimhnak in Daan thar 2008 Danpui nai thu phuang kio awng ii. Cia a phuang fangin Kawlram mipui tam sawn in tu thupui in ruat cuang lo ii. Cia 2008 Daanpui hmangin 2010 kum ah General Election kin bawn ai, cia Election ah NLD te in Ralkap cozah in Election bawnhnak lungkhim lo tiin tel hiam lovin umh bawn ii. Cetin 2010 kum ah Hluttaw tohkham tam ber USDP in ngah in 2015 tian Kawlram kin uk ii. 2012 kum ah NLD te khai term hrek election (By Election) ah tel leh sal in tohkham tam ber ngah awng ai, 2015 General Election ah hluttaw tohkham tam ber ngah in 2020 kum tian cozah per i hang.

Zawlhnak 1hnak:

2008 Danpui bawn fangin Kawlram mipui in thupui in ruat lovin tunah Kawlram in Election vai 2 nai zo ai, 2020 kum November ah General Election vai 3hnak nai tuh i hang. Rel hiamhnak tu, Kawl in mipui zawl in 2008 Danpui kin bawn sah zo ii.

Zawlhnak 2hnak:

2008 Danpui hmangin cozah thar ding in tunah Tlangvum miphun te thawn remhnak bawn in Democracy le Federal thupui in ruatin Union Peace Conference meeting to zo ai lungkhimhnak Peace Accord 3hnak tian bawn zo, sign tlang zo i hang. Cia Peace Accord hmangin Kawlram heh UNION thar ding tuh i hang. UNION thar ding tuh thu sawn thupui in lar lovin NLD in General Election ah nehhnak co lo lekhaw Kawlram heh Ralkap ukhnak ah lut tuh tiin thu kin bawn lianglo ai, Kawl thunaihnak party haam ber NLD vote tuh khiah Kawl te in thupui sawn in thu kin bawn teng ii. 2020 General Election in tlinghnak cozah in Kawlram ca UNION ram thar ding tuh dan reltu ber in cang tuh ii. Hluttaw/Parliament ah Kawl party le Kawl minung te ian in cozah konhoitu in umh lekhaw Kawlram Union ram thar heh Kawl daihdan Democracy le Federal in daan kin bawn tuh ti a lin ii.

UNION thar kontin ding nga sing, tihnak sawn thupui in ruat lovin Kawl party in nehhnak ngah tuh sawn thupui in mipui thinlung ah umh ruai ngio hnak Kawl in kin zawlhnak heh rohsia ruat thiam kin kul ii. Cozah tihnak tu hiam caan caan ah thlengh daihdo thil i lo ii. A camcu niu ah tel ngah, rel ngah, lang ngah thupui ngai ii.