Kawl ralkap cozah in 2008 kum ah daan thar kin bawn sah hnua 2010 kum ah vel-1hnak Election kin bawn ai, 2015 kum ah vel-2hnak kin bawn zo ii. Hetin kum 10 song ah Zanniat mi songin USDP in maw, NLD in maw Pyithu, Amyota le Pyine ah Zanniat mi pakhat khai hluttaw kin per sahtu umh awng lo ii. He kum 10 song ah USDP in maw, NLD in maw Hluttaw ah minung nai te tu a khua le ram ca sumsaw, cozah bawmhnak le khangsohnak te lang thiam sio ai, ralkap rori in uk lai tahin tu a khangso ngai ii.
Tun kum 2020 November 8 ah hmailam kum 5 song hluttaw kin per sahtu tuh ril leh tuh i hang sing. Election thu ruat fangin Party maw Minung poimawh tiin eldunhnak in kin dim ii.
Zanniat dinhmun in Election thu ruat fangin Party a thupui ngai napui, kin dinhmun in tu minung kin thupui ii. Zanniat mi hluttaw ah MP/MLA kin per sah tu tuh nai tuh kin thupui ber ii. He thu rel fangin NLD lo tu tiin ruat thai ii. 2015-2020 tian NLD party in cozah kin per sah khaw ralkap thunaihnak eel ben cuang lo, ralkap daan 2008 thleng thil lo, ralkap cozah daihdah thotho in kin hoi ii. Ikhalkhaw hlanlai bangin ralkap rori in kin uk lo hang maan kin zia ngai, sumsaw le naihnak lam ah rohsia kin khangso thotho ii.
Chin mi lakah Lushai te politics tlawm dung ruat nga singkhaw, Chin party le NLD in Lushai te in hluttaw ngah tuh itsik ngio maan Lushai/Mizo te tu USDP party sawn in hluttaw cuh kio ai, tam ngai phathnemhnak nai thotho ii.
Ciamaan, Zanniat mi in cozah ah hluttaw ah to bentu tuh minung kontin nai tuh ve ii sing?
Party kin naihnak USDP, NLD le Chin party (CNLD) songah Zanniat mi MP/MLA kin cuh sah bentu kin nai maw tihnak thupui ber ii.
Tunah 2020 Election ah Zanniat mi in Hluttaw kin cuh sah bentu tuh heh party in kin sik fangin CNLD ian ah minung nai ii sing. NLD ah Zanniat mi in hluttaw kin cuh sah tu tuh umh selai NLD bawm tuh hnak ii. USDP in Zanniat mi in kin cuh sah tuh umh selai USDP vote tuh hnak ii sing.
Kin miphun le ram ca cozah ah, parliament ah kin kulhnak le samhnak thu kin keng sah bentu tuh umhsun heh 2020 kum election ah Zanniat in CNLD party ian ah minung nai ii sing. CNLD kin daih lovin khai kum 10 rori mi hnua ah kin tang zo hnak heh dum tento tuh hnak rori in CNLD party song ai Salai Tawk Za Lian (Sai Tawk Tawk) heh Pyine (State Hluttaw) ah hluttaw kin per sah tuhin vote tuh hnak ii sing.
Tuntum 2020 Election ah Zanniat in Hluttaw ah minung kin nai lo lekhaw kum 15 mi hnua ah kin tang tuh i hang. Cia heh aisu te mawh i tuh ii ti fangin midang te hluk pha umh lo, Zanniat te kin mawh, kin voi maan i tuh ii.
Comments
Post a Comment