ROHINGYA THUBUAI PU ZA HLEI THANG IN A RAK REL MI

Mipi cun Rohingya le Muslim kan hua, Kawram in dawi hlo thluh, that theh khal poi kan ti lo.

2015 kum Dec hla ah USA ihsin Pu Za Hlei Thang in Canada a ra tlawng ih, mipi thawn zalen zetin thusutawnak kan nei. Rohingya thu kan rel tel.

Pa Za Hlei cun, Rohingya pawl hi minung an si ve ih, ramsa bangin thah thluh men, hlon men theih an si lo thu, Kawlram acozah in thaten rammi sinak ID/hmatpungtin tuah sak ih, an lut le suak, an khawsakdan pawl control theih an si sawn ding, a rak ti. Tu vek ih duhduh ih Kawlram le Bangladesh karlak ah an lut suak hluahhlo hi ram hrang a him lo thu a rel.

Kei khal a thok cu ka thin a so dukdi naan kan hun ruatsal tikah Pu Za Hlei ih hmudan le ruatdan cu pom tulmi asi ti ka fiang ve.

Kum reipi ram pakhat ah um zo, tesin fa san tampi tiang um zo hnu tiang ih rammi sinak nei lovin, vakvai in zo khal in kan um duh lo. Cuvek thotho cu Rohingya pawl ih dinhmun khal asi ve. Thaten a pekte ihsin rammi sinak nei ih, Kawlram dan thlun terin um ter hai sehla, buainak a um le acozah lam in dan vekin olten kilkhawl theih an si ding. Tu cu, rammi sinak nei lo, mi ram ih thu nei duh, misual hlotlau vekin duhvekin zohsuam theihin Rohingya pawl an um hi, zo ih mawh kan ti le ram uktu Kawl ralkap acozah mawh asi ko.