CREATION SCIENCE

Canada ram ah i umh hnua he ram ai mi khangso le mifim, ram khangso ai te khuaruatdan te zong zianzo ingkhaw, tlawng phun niam ber an phunsang lam tian ai mite sanhnak i siik fangin Pathian umh tihnak sang lo a tam sawn ii. Zaimaan Pathian umh tihnak sang lo in cang sio tihnak i hleng ngom ah lingthiam de lo ing. Pathian umh sang lo Mirang (vun var) te pawl i tawkhnak te thu zawt zianzo de ingkhaw, a nu le pa, a pi le pu te tu Roman Catholic i hlah lekhaw, Anglican church ah a kho ber pawl, conservative roh pawl i ngio de ii. Pathian umh sangtu khangthar tam sawn heh Protestant church, Evangelical pawlpui an khang i de ii. (Roman Catholic zohsuam thu relhnak i lo ing). Hetih hang le zaimaan Roman Catholic le Anglican te bang ai khangthar tam sawn heh Pathian umh sang lovin cang sio tihnak ruat pha tam ngai ii.

Tunlai Western ram ah khangthar veksen tluk, i ruathnak in 90%+ heh Pathian (God, Creator) umh sang lo ii. Hetih bang ai canghnak san ber tu Academic tlawng in zirhnak Biology maanin hmu ing. High school, College le University ah Biology in a pomhnak ber heh Evolution Theory maan ii. 

I tlairawl lai Aizawl (Mizoram, India) ah phun 10 i kai fangin Biology zir awnghnak ah Darwin ai  Theory of Evolution zir awng ii ing. Kin saya te in thupui ze lovin kin rel ai, ling pha ve tiin zir menma awng ii ing. Cia hnua Canada ram ah vaai in tlawng kai leh fangin High School le College/University ah Evolution Theory heh Biology zir fangin rohsia zir kul le ling kuul in cang so ai, Evolution sang lo heh mi bang lo, mi voi, Biology ling lo in reldunhnak in cang ii.

Kin Laimi/Chinmi tu Pathian kin sangdan heh hlanlai ai khawvang kin sang, kin lau daan thawn a bangdun ti de ing. Pathian a ihnak ruatin sang i lo ai, sakhua dang te pawl in pathian a sangdan thawn kin dang de lo ii. He maan, khawruat pha le fimthiamhnak tel in rel tuh fangin Christian pawl ai kin thu lingdan tu sakhua phunkhat bang menma in kin cang de ii.

Academic in Evolution hmangin Biology kin cuukhnak in Christian tam ngaiin Pathian in Evolution hmangin Pathian in minung kin bawn in sangtu khai tam amam i hang. Pope Francis (Roman Catholic) in rin 2014 kum ah Evolution heh pom tlak a i thu phuang awng zo ii. Hetan, secular rori in sang zianzo tuh fangin Pathian umh sang kuul lo lam tian ah cang thai kio ii.

Academic in Biology heh Evolution hmangin a relhnak heh Academic lam ai mithiam Pathian sang pawl in Science hmangin Evolution dik lo hnak, Biology hmangin relhnak heh Christian mi tam sawn in ling de lo ii sing. Science hmangin Pathian umh sanghnak thu heh Creation Science tiin ko de ii.

Creation Science in relhnak Science reports, articles te pawl, research paper te bang heh siar tlak ngai ii. Tuntian laivum ah Academic bangin Creation thula zonghnak Science heh a tlawm ngai ai, cia bang songin Institute of Creation Research (ICR https://www.icr.org) heh a pha ngai ii. ICR in hla siar Acts & Facts magazine suah ṭio ai, manlo (free) in ngah thil ii. Pathian kin hmudan le kin linghnak a kho tuh sinin Creation Science zir tel pha ii.