ZANNIAT IN KIN DING THIL LO HNAK HEH SIATTON MAAN

Tuntian kin sik fangin Zanniat kin suakhmun khua le ram naihsun Laitlang ah Zanniat in Zanniat khua le ram huap pawlkom pakhat khai umh lo ii. Zanniat khua le ram huap in umhsun pawlkom haam ber khiah Runhlang Siatton Pawlkom (RSP) ii. Siatton in a ding hnak san hlanlai tluanthu rel pha tam ngai umh tuh ii.

Tun ai dinhmun in siik fangin Siatton heh Zanniat mi ian i lo, pong dang hmang Khualsim, Taisun, Tapong le Ngawn te tian telhnak ii. Laitlang dinhmun siikin Siatton ah teltlang liang bangin umh napui pong dang hmang te khiah Kawlram lam le hmundang ramdang ah ah amahte miphun ah tel sio, ai Zanniat ah kin tel cuang lo ii. Cia maanin Laitlang ai Siatton tu Zanniat pawlkom i fawn lo, Zanniat te huaphnak pawlkom bang, Zanniat in ding thil hlong lovin a hnuata ber ah tu Zanniat miphun le ram ca thureltlanghnak le kilkhawldun thilhnak pawlkom i lo maanin Zanniat miphun le ram khiah khangso thil lo, mer thil lovin kin cang ruaitu pawlkom i ngio ii. He Siatton Pawlkom maanin tuntian Laitlang ah Zanniat in khua le ram huapin konghoidun thil lo hnak i fawn ii. Cia leek zolo, Siatton in huaphnak khua le ram khiah Hlangta Zanniat ram lam ian huap ai, Zanniat Sakta le Hlangta in khan ruaitu le Zanniat tlangtlang hmun khatin thu reltlang thil lo hnak in Siatton heh cang ngio ii.

Miphun le ram thu ah aisu khai hmaisong dun kuul lo maanin Laitlang ai Siatton heh com kuul i hang. Khualsim, Taisun, Ngawn le Tapong in amahte miphun in pawlkom ding sio, tawkdun sio zo ai, cia lakin Zanniat tu Siatton in Sakta le Hlangta in khang ruai leek zolo Zanniat miphun ca thu thureltlanghnak tuh pawlkom nai lo miphun vaakvai in kin cang zo ii.

Ciamaan, Zanniat heh Laitlang ah miphun le ram ruatin konghoidunhnak Zanniat pawlkom ding a kuul ngelngo i hang. Laitlang Zanniat khua le ram khiah Zanniat in ding ben fang ian in kin miphun le ram heh kilkhawldun ben tuh sawn ai, kin khangso tuh sawn ii.