Zanniat mi le ram politics thu heh zaikom in lar pan ii, tihnak ruat pha umh ii. I tawkhnak le i hmudan in Zanniat mi le Zanniat ram politics heh a lar panhnak kin rai lai lo ii. Tunhlan ah rel lianglo tuh napui, a lar panhnak ngaingai heh ruat zianzo fangin Kawlram ralkap acozah hnia ah zonzai in ramdang dang ah kin tlan lianglo fangin ram le miphun politics heh Zanniat ah kin lar pan in hmu ing.
 |
| Nisuak lam Kawlram hmun rawn an Zanniat ram |
Tunhlan lam kin politics sik zianzo fangin Zanniat ram le miphun politics thu umh lo ii. Ram in a huap ban politics tu Lumbang ram, Sakta le Hlangta ram politics le circle san lai thu umh ii. Cia vum ah Falam township, i hlah lekhaw Falam politics ii.
He thu ruatin kin thu umhdan heh Refugee san hlan le hnualam Zanniat politic tiin khan thil ii. Refugee hlan politics tu Sakta-Hlangta politics, Lumbang politics, khua politics heh Zanniat kin in kin naihnak politics ii. Zanniat ram le miphun huap thu umh de lo ii. Zanniat ram le miphun huap in thu umh lo ai, Sakta-Hlangta politics le khua politics in feh ai, cia vum ah Falam politics ah khawmdun sio politics ii.
Zaimaan miphun le ram politics kin kuul? Cia heh Refugee san in kin pan ti thil ii. Kawlram kin buaihnak heh 8888 buaihnak le 1990 ah NLD party in acozah per ngah lo politic dung i lo tihnak heh khangthar nonawn te in lingthiam zianzo i hang. Kawlram kin buaihnak heh miphun le ram politics maan tihnak, Independent politics, Federal politics, Selfdetermination politics tebang maan tihnak lingthiam zianzo ii sing. Cen, kin nong ber Mizoram state (India) ram khiah politics kin zir hmunpui in cang so ai, Democracy ukhnak ram ah miphun le ram politics ih zai tluk a kilkhawldun ben ai, thu a nai ai, a ram ah zai khai suak lo rori a khangso roh tihnak hmu zianzo hnak in khangthar mi tam ngai in Zanniat in ram le miphun ah khangso kin kul tihnak ruat hal zianzo ii sing. Cen, laivum ah media le Internet a khangsohnak in miphun le ram thula reltlanghnak le khuaruathnak ah kin khangso ruai amam i hang.
 |
| 1943 kum ai British in uk fangin Zanniat ram dinhmun |
A vum lam ai i relhnak bangin, tuntian Zanniat mi song ah khawruathnak phun hnih in umh ii sing. Refugee san hnua lam ai Zanniat ram le miphun politics heh tunhlan refugee san hlan lai ai, ukdundan politics kin khan ii. He thu ruatin Zanniat mi song in kum upa le konghoitu hmasa te ai daihdan le khangthar te daihdan heh a kopdun thil lo bang tian in rin rohze in lang hiam hrang tu cang thil pah ii.
Laivum ah minung kin pung sinsin napui lailung le ram heh a pung lam umh lo ai; thu le la, fimhnak le thiamhnak nai in kilkhawldun benben, konghoidun benben pawl ai konghoihnak heh a cak tuh sinsin ai, cia politics in kin uk tuh ii.
Cia ruatin Zanniat mi in kin politics heh update kin kul ti ruat kongin...
Salai Tluang Kip Thang
Ottawa, Canada
Comments
Post a Comment