I naupang lai ah i pa in Taisun pon in i pon ai i nu in Balai/Laizo (Falam) pon in i pon ii. I tlangval hnua lam tian in Zanniat pon pong hmang awng lo ing. I naupang lai ah Lingsuh (Tihang) khua ai i pa unau le songkhat te tlawn de fangin amahte hnen in Zanniat pon za de ing. Amahte in Zanniat in i pon ai Falam pon in sawn de ing.
Mi tam ngai in miphun tihnak tu pa le pu lam in kenghnak in rel ii. I pa in Taisun pon in i pon maan Taisun mi in vuah dun de ing. Taisun mi in ruat dun napui hiang ai mi te sik fangin Falam pon hmang in khangso sawn le mi lak ah laikal ben sawn in hmu in Falam mi ti dun de ing.
I pa hnen in:
Vaikhat tu Pu Ro Za Thang in i pa heh Zanniat mi ii tiin i rel awng ai, i aican in i pa zawt awng ing. I pa in Zanniat song ai Laizo hin kin i thu le Taisun in kin upa te uk maan Taisun pon hmang in kin cang thu com niu in i rel ii. I pa tu tlawng phunsang kai lo i maan thule umhdan i daih bangin i rel ben ve lo ii. Cetin Falam mi ngai in i nung de hnak i pa hnen in Zanniat mi kin i thu i ling pah Zanniat thu zong zianzo ingkhaw Zanniat pon hmang te khiah hlanlai ah mi hmingthang te umh awng thu te, Falam peng ah Khrihfa i hmasa ber thu te mi hnen in ling ing.
Zanniat i maan tha i so roh awng:
Falam peng ah Zanniat miphun umhnak ram konah ii tiin mi hnen ah zawt kongin Falam peng ramzuk heh computer ah sik in Zanniat khua i linghnak te cia zuk ah dah zianzo kongin ram kau ngai tihnak hmu ngah ing. Pu Albert Sanglyen in vai khat tu Zanniat Yahoo E-mail group ah Stephenson in 1943 kum ai nganhnak Falam peng ukdan ramzuk hlat awng ai, cia zuk heh Falam peng ramzuk vum ah dah in sik fangin Zanniat umhnak ram khiah ram kau ngai ii tihnak hmu fangin miphun pui in ding tlak in hmu in Zanniat mi ihnak i lingdun maan tha i so roh awng ii.
 |
| Ancestral Land of Zanniat Indigenous people in Chin hills |
Zanniat in i thangnau:
Zanniat in ram kau ngai nai thu ruatin Zanniat in konghoidun tlak in ruatin Zanniat pon zir cop in pong pan ing. Zanniat mi lakah tlangleng pan ing. Zanniat in pawlkom dinghnak ah tel i kul in ruat in pawlkom le committee dangdang ah tel ing. Cia lakin vaikhat tu Delhi ah Lumbang Ram Mawi le Zanniat Tluanthu tihnak laibu heh rualpui te hnen ai siar nga awng ing. Thupui ngai in ruatin computer ah a song ai tluanthu nganhnak te khiah siar leh thil tuhin ngan leh ing website tian ah sik thil in dah ing. He Zanniat tluanthu i siar pah tu zaimaan hlanlai pah tuntian miphun in tungding thil lo, konghoihnak nai thil lo thu te thu tam ngai ruat kul in i cang kio ii. Zanniat tluanthu sik fangin upa te hnen in ling pha umh de lo hnak hlanlai ai Zanniat heh raal neh lo maan sal in umh thu te, siah le lukhawng pe kul in kum 100 lai umh awng thu te, siar ngah ing. Cia thu heh Cary & Tuck in Chin Hills Vol-1 ai thula nganhnak te thawn i siik fangin Mirang in Zanniat in ngan lo napui a song ai Taisun (Tashon) ram le ukhnak te khiah Zanniat ram i thu te ling ngah fangin Zanniat mi heh Sal (Slave) miphun kin i thu te, hlanlai ai ukhnak le konghoihnak maan kaimah san tian in Zanniat pon hmang te tlanglengdan le umhdan te i sik fangin miphun nau le mithmai nai lo miphun bangin kin umh ai, mi te konghoihnak le mi te mitmai sik in kin umhdan te i hmu fangin tha i nau ruangro awng ii.
Miphun in tung tento:
Mah ihnak miphun heh thilri bangin lon thil lo, hlum thil lo tihnak tam ngai ruat ngah ing. Zanniat mi song in mifim le mithiam, milian tam ngai napui miphun in koghoidunhnak umh lo maan miphun in konghoihnak nai ben te daihdan le konghoihnak ca phahnemhnak sawn in umh sio in hmu de ing. I tesinfa te tian in miphun nau thinlung nai tuh hlen ruatin miphun cawisang kul in ruatin miphun hrang tung tento heh thil sual i lo in ruatin, khangsohnak sawn in ruatin tung tento zuamhnak i nung hlen ii.
Comments
Post a Comment