DANGLAM LO HLANLAI PAH TUHTIAN

Tunia tu rualpui te thawn lamvak kongin miphun thula reltlang zianzo ngah ai, tunhlan lam pah tuntian i tawkhnak rel ngah lianglo ing. 

I tlangval tlairawl dung ruat ngah lianglo ing. 1990 kum dung ah Aizawl (Mizoram, India) ah kum siar tlukin Zanniat veksen mi zapui huapin Dawngpui bawn de ii. Zaimaan cia lai ah  kin innsang in Dawngpui ah tel ve de tihnak ling lai lo ing. Cia lai ah Zanniat mi songin mi nai lar heh Pu Bawi Sawn (Mizoland), Pu Paṭiak (Sena, Love Photo), Pu Lian No Thang le Pu Hrin Zam te pawl khiah Zanniat Boss te ii. Bus 3-4 lai to in Aizawl khua pua lam ah Zanniat veksen huap Dawngpui picnic hmangtlang awng de ii ing. I naupang lai tahang cia lai heh kaimah lala Zanniat mi in lingdun lai lo ai, Zanniat mi kin i thu phan takin i reltu umh lai lo ii. Falam, Mizo le Taisun pong ian hmangin i nung lai teng ii. Zanniat pon hmang te in cia bangin mi zapui huapin Dawngpui hmang tlang, rong aitlanghnak bawn ben hnak siikin upat tlak ngai in ruat de ing. Cetin i uham zianzo khaw, i pa in vaikhat tu kin heh Laizo hin kin i thu le Laizo heh Zanniat ah kin tel thu i rel pah tu i miphun thula rohsia zong pan awng ing. Ciamaan Aizawl lam ai i kom thilhnak upa te tawk zianzo in, Zanniat ah tel zianzo ing. Cia bang ai Zanniat ah tel tuhin i sawmtu heh Pu Ro Za Thang ii.

Zanniat pon hmang te lungrual thai roh, upat tlak rohin i ruat awnghnak, hnuata lam ah tuntian in i tawkhnak tu naper tlang thil ngaingai lo, Zanniat huapin konghoidunhnak nai thil lo, Zanniat in pawlkom ding rin a daih lo te Zanniat pon hmang Zanniat mi songin tuntian in umh lianglo thu te i hmu fangin mak ti ngai ing. Zaimaan hetin Zanniat peng le tlang ah Zanniat pon hmang tlang sio in a rem thil lo tihnak zong zianzo ingkhaw, hlanlai pah tuntian heh khua le khua in zuamdunhnak, ngaihdun lo hnak, khua le khua in tawngdunhnak thinlung in dim tlang sio in hmu ing. Cia tahin a mak sawn hnak tu Zanniat hmingin Zanniat tlangtluan ai khua veksen huapin Pawlkom ding tuh heh a daih in daih lo te khai umh tihnak ling ngah zianzo ing.

Hlanlai tu khua le khua tawngdun san in kin rel de hnak laivum ram khangso ze computer san kin hleng zo hnua tuntian kin  Zanniat pon hmang te tu hlanlai thawn a bangdun pahin hmu ing.